എറണാകുളം ഏലൂരിലെ ഐശ്വര്യ ജ്വല്ലറിയിൽ വൻ സ്വർണ കവർച്ച. ജ്വല്ലറിയുടെ ഭിത്തി തുരന്ന് അകത്തുകയറിയ മോഷ്ടാക്കൾ ഏകദേശം ഒന്നര കോടിയോളം രൂപ വിലമതിക്കുന്ന 300 പവൻ സ്വർണാഭരണങ്ങൾ കവർന്നു.ഇന്ന് പുലർച്ചെയാണ് മോഷണം നടന്നതെന്നാണ് പ്രാഥമിക വിലയിരുത്തൽ. രാവിലെ കട തുറക്കാനെത്തിയ ജ്വല്ലറി ഉടമയാണ് മോഷണം നടന്ന വിവരം ആദ്യം കണ്ടെത്തിയത്. ജ്വല്ലറിയുടെ പിൻഭാഗത്ത് ഭിത്തി തുരന്നാണ് മോഷ്ടാക്കൾ അകത്തുകയറിയത്. തുടർന്ന് ലോക്കറിൽ സൂക്ഷിച്ചിരുന്ന മൂന്ന് കിലോയോളം വരുന്ന സ്വർണാഭരണങ്ങൾ കവർന്നതായി ജ്വല്ലറി ഉടമ പറയുന്നു. ഗ്യാസ് കട്ടർ ഉപയോഗിച്ചാണ് ലോക്കർ തുറന്നത്. 25 കിലോയോളം വരുന്ന വെള്ളി ആഭരണങ്ങളും നഷ്ടപ്പെട്ടു.സംഭവത്തിൽ പൊലീസ് അന്വേഷണം ആരംഭിച്ചു.ജ്വല്ലറിയോട് ചേർന്ന് സലൂൺ പ്രവർത്തിക്കുന്നുണ്ട്. ഇതിന്റെ പിൻവശത്തുള്ള ഭിത്തി തുരന്നാണ് മോഷണ സംഘം അകത്തുകയറിയതെന്നാണ് പൊലീസ് പറയുന്നത്.