ദുരിതാശ്വാസനിധിയുടെ പേരിൽ വ്യാജപ്രചരണം നടത്തിയെന്നാരോപിച്ച് കെ എൻ ഷാജി എം എൽ എയ്ക്കെതിരെ ആഞ്ഞടിച്ച് മുഖ്യമന്ത്രി പിണറായി വിജയൻ. ദുരിതാശ്വാസനിധി സർക്കാർ ദുരുപയോഗം ചെയ്തുവെന്ന ഷാജിയുടെ ആരോപണത്തിന് മറുപടി പറയുകയായിരുന്നു മുഖ്യമന്ത്രി. അവലോകനത്തിന്  ശേഷമുള്ള വാര്‍ത്താസമ്മേളനത്തില്‍ മാധ്യമപ്രവര്‍ത്തകരുടെ ചോദ്യത്തിന് മറുപടി നല്‍കവെയായിരുന്നു ഷാജിയെ പിണറായി കടുത്ത ഭാഷയിൽ ശാസിച്ചത്. ഷാജിയുടെ പാർട്ടി കോവിഡ് പ്രതിരോധപ്രവർത്തനങ്ങളോട് പൂർണ്ണമായും സഹകരിക്കുന്നുണ്ടെന്നും ഇത്തരം പ്രതിസന്ധിഘട്ടത്തിൽ ഇതുപോലുള്ള വികൃതജീവികൾ ധാരാളമുണ്ടായിരിക്കുമെന്നും മുഖ്യമന്ത്രി ആക്ഷേപിച്ചു. "സാങ്കേതിക കാര്യങ്ങള്‍ അറിയാത്ത ഒരുപാട് പാവപ്പെട്ട ആളുകള്‍ നാട്ടിലുണ്ട്, അവരെ തെറ്റിദ്ധരിപ്പിക്കാന്‍ ഷാജി ശ്രമിക്കുന്നത് എന്തിനാണ്? ഇത്തരമൊരു ഘട്ടത്തില്‍ ഇങ്ങനെ ഒരു നിലപാടാണോ എടുക്കേണ്ടത്?." മുഖ്യമന്ത്രി ചോദിച്ചു. ഇങ്ങനെ എന്തെങ്കിലും "ഗ്വാ ഗ്വാ" ശബ്ദമുണ്ടാക്കിയാല്‍ അതാണ് ഏറ്റവും വലിയ ശബ്ദമെന്ന് കാണേണ്ടതില്ല എന്നും പിണറായി സൂചിപ്പിച്ചു.