ഉന്നാവ് ബലാത്സംഗക്കേസില്‍ പ്രത്യേക കോടതി  ശിക്ഷിച്ച മുൻ ബിജെപി എം എൽ എ കുൽദീപ് സിങ്ങിന്റെ നിയമസഭാ അംഗത്വം റദ്ദാക്കി. പതിനേഴുകാരിയെ ബലാൽസംഗം ചെയ്ത കേസില്‍ എംഎല്‍എ കുറ്റക്കാരനെന്ന് കണ്ടെത്തിയ കോടതി  ജീവപര്യന്തം തടവ് ശിക്ഷയ്‍ക്ക് വിധിച്ചിരുന്നു. ഉന്നാവിലെ ബാംഗര്‍മൗ നിയോജക മണ്ഡലത്തില്‍ നിന്നുള്ള നിയമസഭാംഗമായ കുല്‍ദീപ് സിങ് സേംഗറെ അയോഗ്യനാക്കിക്കൊണ്ടുള്ള വിജ്ഞാപനമാണ്  പുറത്തിറങ്ങിയത്. കുല്‍ദീപ് സിങ്ങിനെ ഡല്‍ഹി കോടതി ജീവപര്യന്തം ശിക്ഷ വിധിച്ച 2019 ഡിസംബര്‍ 20 മുതല്‍ അദ്ദേഹത്തെ അയോഗ്യനാക്കിയതായാണ് വിജ്ഞാപനം. നേരത്തെ സേംഗറെ ബി.ജെ.പിയില്‍ നിന്നും പുറത്താക്കിയിരുന്നു.