അട്ടപ്പാടി മഞ്ചക്കണ്ടി വനത്തിൽ തണ്ടർബോൾട്ട് മൂന്ന് മാവോയിസ്റ്റുകളെ കൊന്നതിനെതിരെ പ്രതികരിച്ച് സി.പി. ഐ സംസ്ഥാന സെക്രട്ടറി കാനം രാജേന്ദ്രൻ രം​ഗത്ത്. മാവോയിസ്റ്റുകളെ വെടിവെച്ചു കൊല്ലുന്നതിനെതിരെയുള്ള സി.പി. ഐ നിലപാടിൽ മാറ്റമില്ലെന്നും അട്ടപ്പാടിയിൽ എന്താണ് സംഭവിച്ചതെന്ന് പഠിച്ച ശേഷം പറയാമെന്നും  കാനം പറഞ്ഞു 

.‌ഏറ്റുമുട്ടലെന്ന പേരിൽ മാവോയിസ്റ്റുകളെ കൊല്ലുന്നതിനെതിരെ മുമ്പും കാനം രാജേന്ദ്രൻ രം​ഗത്തുവന്നിരുന്നു. 2016-ൽ നിലമ്പൂർ കരുളായി വനത്തിൽ മാവോയിസ്റ്റ് അഖിലേന്ത്യാ നേതാവ് കുപ്പു ദേവരാജിനെയും അജിതയെയും തണ്ടർബോൾട്ട്  സേന വധിച്ചതിനെതിരെ കാനം ശക്തമായി പ്രതികരിച്ചിരുന്നു. വ്യാജ  ഏറ്റുമുട്ടലിലൂടെ മാവോയിസ്റ്റുകളെ കൊല്ലുന്നതിനെ  ഉൾക്കൊള്ളാനാവില്ലെന്നാണ് കാനം അന്ന് പ്രതികരിച്ചത്. മാവോ വേട്ട കേരളത്തിൽ വേണ്ടെന്നും കാനം തുറന്നടിച്ചിരുന്നു.2019 മാർച്ചിൽ വയനാട് ലെക്കിടിയിലെ സ്വകാര്യ റിസോർട്ടിലുണ്ടായ വെടിവയ്പിൽ മലപ്പുറം സ്വദേശിയായ സി.പി. ജലീൽ കൊല്ലപ്പെട്ടപ്പോഴും പൊലീസിനെതിരായ നിലപാടാണ് കാനം സ്വീകരിച്ചത്.