ഇന്ധന നികുതി കുറയ്ക്കാൻ സംസ്ഥാന സർക്കാർ ഉദ്ദേശിക്കുന്നില്ലെന്ന് ധനകാര്യ മന്ത്രി കെ എൻ ബാലഗോപാൽ. നികുതി കുറച്ചാൽ അത് കൊവിഡ് പ്രതിസന്ധിക്കാലത്ത് കേരളത്തിന് വലിയ നഷ്ടം വരാൻ ഇടയാക്കും. എല്ലാ നികുതി അധികാരങ്ങളും കവരാനുള്ള നീക്കം അംഗീകരിക്കാനാകില്ല. പെട്രോളും ഡീസലും ജി എസ് ടി പരിധിയിൽ കൊണ്ടുവരുന്നതിനുള്ള കേന്ദ്ര നീക്കത്തെ പിന്തുണക്കില്ലെന്നും ബാലഗോപാൽ പറഞ്ഞു.

പെട്രോളും ഡീസലും ജി എസ് ടി നികുതി ഘടനയിൽ ഉൾപ്പെടുത്തണമെന്ന് ആവശ്യപ്പെട്ട് സമർപ്പിക്കപ്പെട്ട ഹരജിയിൽ ആറാഴ്ചക്കകം തീരുമാനമെടുക്കാൻ കേന്ദ്ര സർക്കാറിനോട് കേരള ഹൈക്കോടതി കഴിഞ്ഞ ദിവസം നിർദേശം നൽകിയിരുന്നു. വിഷയത്തിൽ ജി എസ് ടി കൗൺസിലിന് ഹരജിക്കാരൻ നൽകിയ നിവേദനം കേന്ദ്ര സർക്കാറിന് കൈമാറാനും കോടതി നിർദേശം നൽകി. എന്നാൽ, നിവേദനം നൽകിയിട്ടും നടപടിയുണ്ടായില്ലെന്നാണ് ഹരജി സമർപ്പിച്ച മുൻ കാലടി സർവകലാശാല വൈസ് ചാൻസലർ ഡോ. എം സി ദിലീപ് കുമാറിന്റെ വാദം.