മൻസൂർ വധക്കേസ് പ്രതി രതീഷിനെ മറ്റു പ്രതികൾ കെട്ടിത്തൂക്കിയതാണെന്ന് കോൺഗ്രസ് നേതാവ് കെ. സുധാകരൻ പത്രസമ്മേളനത്തിൽ ആരോപിച്ചു. വളയത്ത് ഒരു സിപിഎം കാരന്റെ വീട്ടിലാണ് പ്രതികൾ ഒളിവിൽ താമസിച്ചത്. ഇവിടെവെച്ച് ഇവർ തമ്മിൽ തർക്കമുണ്ടായി. ഒരു പ്രാദേശിക നേതാവിനെതിരെയുണ്ടായ പരാമർശമാണ് തർക്കത്തിനിടയാക്കിയത്. ഇതോടെ അടിപിടിയായി . ആ സമയം ബോധംകെട്ട രതീഷിനെ മറ്റ് പ്രതികൾ കെട്ടിത്തൂക്കിയെന്നാണ്  നാട്ടിൽനിന്ന് ലഭിക്കുന്ന വിവരമെന്നും അദ്ദേഹം പറഞ്ഞു.പനോളി വൽസൻ എന്ന നേതാവാണ് മൻസൂർ കൊലക്കേസ് ആസൂത്രണം ചെയ്തത്. വോട്ടെടുപ്പ് ദിവസം തിരഞ്ഞെടുപ്പ് ചാർജ് ഉണ്ടായിരുന്ന സ്ഥലത്ത് പനോളി വൽസൻ വരാതിരുന്നത് സംശയകരമാണെന്നും സുധാകരൻ പറഞ്ഞു.