കേരള കോൺഗ്രസ് മാണി വിഭാഗം ചെയർമാൻ ജോസ് കെ.മാണി തലശ്ശേരിയിലെ അരമനയിലെത്തി ബിഷപ്പുമാരെ സന്ദർശിച്ചു. നിയമസഭാ തെരഞ്ഞെടുപ്പും സീറ്റ് വിഭജന ചർച്ചകളും രാഷ്ട്രീയ കേരളത്തിൻറെ പടിവാതിൽക്കൽ എത്തി നിൽക്കെയാണ് ജോസ് കെ മാണിയുടെ അപ്രതീക്ഷിത സന്ദർശനം. രാവിലെ എട്ടരയോടെ ബിഷപ്പ് ഹൗസിൽ എത്തിയ അദ്ദേഹം അതിരൂപതാ അധ്യക്ഷൻ മാർ ജോർജ് ഞരളക്കാട്, മുൻ ആർച്ച് ബിഷപ്പ് മാർ ജോർജ് വലിയ മറ്റം എന്നിവരുമായി കൂടിക്കാഴ്ച നടത്തി. കൂടിക്കാഴ്ചയിൽ സഹ വൈദികരും സന്നിഹിതരായിരുന്നു. രാവിലെ മലബാർ എക്‌സ്‌പ്രസിന് തലശ്ശേരി റെയിൽവേ സ്റ്റേഷനിൽ വന്നിറങ്ങിയ ജോസ് കെ.മാണി, പാർട്ടിയുടെ കണ്ണൂർ ജില്ലാ നേതാക്കൾക്കൊപ്പം ഗസ്റ്റ് ഹൗസിലെത്തിയ ശേഷമാണ് ബിഷപ്പ് ഹൗസിലെത്തിയത്.