സിപി ഐ (എം) പോളിറ്റ് ബ്യൂറോ യോഗം ഇന്ന് ഡൽഹിയിൽ ആരംഭിക്കും. രാജ്യത്തെ തൊഴിലില്ലായ്മയും സാമ്പത്തിക മാന്ദ്യവും ഉൾപ്പെടെയുള്ള വിഷയങ്ങൾ പോളിറ്റ് ബ്യൂറോയിൽ ചർച്ചയാകും. രണ്ടാം എൻ ഡി എ സർക്കാരിന്റെ ഭരണത്തിന് കീഴിൽ രൂക്ഷമായ സാമ്പത്തിക മാന്ദ്യം യോഗത്തിൽ സജീവ ചർച്ചയാകും. കാശ്മീരിന് ഉണ്ടായിരുന്ന സവിശേഷ ഭരണഘടനാ പരിഗണന റദ്ദാക്കിയതിനു ശേഷം നടക്കുന്ന പോളിറ്റ് ബ്യൂറോ യോഗത്തിൽ വിഷയം മുഖ്യ അജണ്ട ആകും. 

നേരത്തെ കശ്മീർ വിഷയത്തിൽ സിപി ഐ (എം) ജനറൽ സെക്രട്ടറി സീതാറാം യെച്ചൂരി സുപ്രീം കോടതിയെ സമീപിക്കുകയും പി ബി അംഗം യൂസുഫ് തരിഗാമിയെ കശ്‍മീരിൽ ചെന്ന് കാണാൻ അനുമതി നേടുകയും ചെയ്തിരുന്നു. കശ്‍മീരിലെത്തി തരിഗാമിയെ  സന്ദർശിച്ച യെച്ചൂരി തരിഗാമിയുടെ ആരോഗ്യനില സംബന്ധിച്ച് വിശദമായ സത്യവാങ്മൂലം കോടതിയിൽ സമർപ്പിച്ചിരുന്നു. ഇതേ തുടർന്ന് സുപ്രീം കോടതി യൂസഫ് തരിഗാമിയെ ഡൽഹി എയിംസിലേക്കു മാറ്റണമെന്ന് നിർദേശിക്കുകയും ചെയ്തിരുന്നു.