ശബരിമലയെ സർക്കാർ വിനോദസഞ്ചാര കേന്ദ്രമാക്കുന്നുവെന്ന കുമ്മനം രാജശേഖരന്റെ പ്രസ്താവനയ്ക്ക് മറുപടിയുമായി മന്ത്രി കടകംപള്ളി സുരേന്ദ്രൻ. കുമ്മനത്തിന്റെ ഉദ്ദേശ്യം എന്താണ് എന്ന് എനിക്കറിയില്ലെന്നും ശബരിമലയെ തകർക്കുക എന്നുള്ള ഉദ്ദേശ്യമാണോ ഈ കള്ളപ്രചരണത്തിന്റെ പിന്നിലുള്ളതെന്ന് മനസിലാക്കാൻ സാധിച്ചിട്ടില്ലെന്നും കടകംപള്ളി പറഞ്ഞു.

അത്തരം അഭിപ്രായങ്ങൾക്ക് വലിയ വില കൊടുക്കേണ്ടതുണ്ടോ എന്ന് അറിയില്ല. കാരണം ഇത് തീർഥാടകരുടെ കേന്ദ്രമാണ്. തീർഥാടകരാണ് ഇവിടെ വരുന്നത്. കഴിഞ്ഞ ഒരു നൂറുവർഷമായി തീർഥാടകർ എത്തിച്ചേർന്നു കൊണ്ടിരിക്കുകയാണ്. ഈ വർഷം സവിശേഷമായ വർഷമാണ്. അത് നമുക്കെല്ലാം അറിയാം.

ശബരിമലയോടും വിശ്വാസത്തോടും അദ്ദേഹത്തിന് അൽപമെങ്കിലും കൂറോ താൽപര്യമോ ഉണ്ടായിരുന്നെങ്കിൽ ഇങ്ങനെയുള്ള വില കുറഞ്ഞ അഭിപ്രായപ്രകടനങ്ങൾ അദ്ദേഹത്തിന്റെ ഭാഗത്തു നിന്ന് ഉണ്ടാകുമെന്ന് താൻ കരുതുന്നില്ല. ഉണ്ടാകാൻ പാടില്ലായിരുന്നുവെന്നും കടകംപള്ളി പറഞ്ഞു.