കൊറോണ വൈറസ് വാക്സിൻ തയ്യാറായാൽ എല്ലാ ഇന്ത്യക്കാർക്കും സൗജന്യമായി ലഭ്യമാക്കണമെന്ന് ഡൽഹി മുഖ്യമന്ത്രി അരവിന്ദ് കെജ്‌രിവാൾ ശനിയാഴ്ച പറഞ്ഞു. അടുത്തയാഴ്ച നടക്കുന്ന ബിഹാർ തിരഞ്ഞെടുപ്പിനുള്ള പ്രകടനപത്രികയിൽ സൗജന്യ കോവിഡ് വാക്സിനുകൾ വാഗ്‌ദാനം ചെയ്തത് സംബന്ധിച്ച്‌ ഭരണകക്ഷിയായ ബിജെപി തുടർച്ചയായ വിമർശനം നേരിടുന്നതിനിടെയാണ് കെജ്‌രിവാളിന്റെ അഭിപ്രായപ്രകടനം.

'രാജ്യമെമ്പാടും സൗജന്യ വാക്സിൻ ലഭിക്കണം, രാജ്യത്തിന് മുഴുവൻ അവകാശമുണ്ട് …' ഡൽഹിയിലെ ശാസ്ത്രി പാർക്കിലും സീലാംപൂരിലും പുതിയ ഫ്ലൈഓവർ ഉദ്ഘാടനം ചെയ്യുന്നതിനിടെ കെജ്‌രിവാൾ പറഞ്ഞു. ഇത് രണ്ടാം തവണയാണ് ആം ആദ്മി മേധാവി ഈ വിഷയം സംസാരിക്കുന്നത്. തങ്ങൾക്ക് വോട്ട് ചെയ്യാത്ത ഇന്ത്യക്കാർക്കും സൗജന്യ വാക്സിനുകൾ ലഭിക്കുമോ എന്ന് ചോദിച്ച്‌ നേരത്തെ കെജ്‌രിവാളിന്റെ പാർട്ടി ബിജെപിയെ നിശിതമായി പരിഹാസിച്ചിരുന്നു.