പല ലോകരാജ്യങ്ങളെയും പ്രതിസന്ധിയിലാക്കാൻ പ്രയോഗിക്കപ്പെട്ട ആയുധമാണ് നോവൽ കൊറോണ വൈറസെന്നും അത് ലബോറട്ടറികളിൽ നിർമ്മിക്കപ്പെട്ട് മനഃപൂർവം മനുഷ്യരിലേക്ക് പകർത്തുകയായിരുന്നുവെന്നുമുള്ള ഗൂഢാലോചനാസിദ്ധാന്തത്തിന്റെ സാധ്യത പൊളിയുന്നു. ഒരു സ്വാഭാവിക പ്രകൃതിദത്ത സ്രോതസ്സിൽ നിന്നുമാണ് വൈറസിന്റെ ഉത്ഭവമെന്ന നിർണ്ണായകമായ കാര്യം കണ്ടെത്തി അമേരിക്കയിലെ ഒരു കൂട്ടം ശാസ്ത്രജ്ഞർ. ലോകത്താകെ കൊറോണ ബാധിച്ച് മരിച്ചവരുടെ എണ്ണം ഒൻപതിനായിരത്തോടടുക്കുന്ന സാഹചര്യത്തിലാണ് ഇതൊരു ജൈവായുധമല്ലെന്ന നിർണ്ണായകമായ കണ്ടെത്തൽ. നേച്ചർ മെഡിക്കൽ ജേർണലിലാണ് പഠനഫലം പ്രസിദ്ധീകരിച്ചത്. സാർസ് വൈറസുമായി താരതമ്യപ്പെടുത്തിയാണ് നോവൽ കൊറോണ വൈറസിനെക്കുറിച്ച് ശാസ്ത്രജ്ഞർ പഠിച്ചത്.