പനിയെ നിസാരമെന്ന് കരുതരുത്. കാരണം  പനിക്കൊപ്പമുള്ള എന്ററോവൈറസ് ബാധ അത്ര നിസാരക്കാരനല്ലാത്തതാണ് കാരണം. കഠിനമായ തലവേദന, പനി, പേശികളില്‍ വേദന, ഛര്‍ദി തുടങ്ങിയവയാണു രോഗ ലക്ഷണം.  ചിലപ്പോള്‍ കാര്യമായ രോഗലക്ഷണങ്ങൾ ഉണ്ടാകുകയുമില്ല. ചിലരുടെ രോഗലക്ഷണം എച്ച് 1 എന്‍ 1 രോഗത്തോടും മറ്റു ചിലരുടേതു മസ്തിഷ്‌ക ജ്വരത്തോടും സാമ്യമുള്ളതാണ്. 

എന്ററോവൈറസ് ബാധിതനായ ഒരാളില്‍ നിന്ന് ആരോഗ്യമുള്ള ഒരാളിലേക്ക് പല തരത്തില്‍ രോ​ഗം പകരാം. കുട്ടികളിലെ എന്ററോവൈറസ് പ്രധാനമായും മലിനജലം അല്ലെങ്കിൽ കളിപ്പാട്ടങ്ങള്‍ വഴിയാണ് പകരുന്നത്.വായു, ജലം, ഭക്ഷണം എന്നിവയിലൂടെയും ​രോ​ഗിയുമായുള്ള സമ്പര്‍ക്കത്തിലൂടെയും ഈ രോഗം പിടിപ്പെടാം. എന്ററോവൈറസിന് വര്‍ഷങ്ങളോളം ശരീരത്തിൽ  നില നിൽക്കാനുള്ള ശക്തിയുണ്ടെന്ന് മാത്രമല്ല ആന്തരാവയവങ്ങളെ ബാധിക്കുന്നതുകൊണ്ട് മറ്റ് ​ഗുരുതരമായ രോ​ഗങ്ങൾക്കും ഇത് കാരണമാകും.