ഇന്ത്യയിൽ കൊവിഡ് ബാധിച്ച് മരിച്ചവരുടെ എണ്ണം അഞ്ച് ലക്ഷം കടന്നു. ലോകത്ത് ഇതുവരെ ഏറ്റവും കൂടുതൽ കൊവിഡ് ബാധിച്ച് മരിച്ചവരുള്ള മൂന്നാം സ്ഥാനത്താണ് ഇന്ത്യ.ഏറ്റവും കൂടുതൽ  മരണം അമേരിക്കയിലാണുണ്ടായത്‌–9.1 ലക്ഷം. തൊട്ടുപിന്നില്‍ ബ്രസീല്‍–6.3 ലക്ഷം പേര്‍ മരിച്ചു. റഷ്യ നാലാം സ്ഥാനത്താണ്. ഇതുവരെ 3.33 ലക്ഷം പേർക്കാണ് കൊവിഡ് ബാധിച്ച് അവിടെ ജീവൻ നഷ്ടമായത്.

വേൾഡോമീറ്ററുകളുടെ കണക്കനുസരിച്ച്, കഴിഞ്ഞ 24 മണിക്കൂറിനുള്ളിൽ ഇന്ത്യയിൽ 1,100 മരണങ്ങൾ സംഭവിച്ചു, അതിനുശേഷം മരണസംഖ്യ 5,00,087 ആയി. അതേസമയം, ഇന്ത്യയിൽ ഇതുവരെ 40,005,514 പേർ സുഖം പ്രാപിച്ചു. ഇന്ത്യയിൽ ഇതുവരെ 4.19 കോടി ആളുകൾക്ക് കൊവിഡ് ബാധിച്ചിട്ടുണ്ട്. നിലവിൽ 14.35 ലക്ഷം രോഗികളാണ് ചികിത്സയിലുള്ളത്.

2020 മാർച്ച് 12 നാണ് രാജ്യത്ത് ആദ്യമായി കൊവിഡ്ബാധിച്ച് മരണം റിപ്പോർട്ട് ചെയ്തത്. 2020 ഒക്‌ടോബർ 2 ന് രാജ്യത്ത് കൊവിഡ് ബാധിച്ച് ഒരു ലക്ഷം പേർക്കാണ് ജീവൻ നഷ്ടമായത്. ആദ്യ തരംഗത്തിൽ 1.55 ലക്ഷം പേർക്ക് ജീവൻ നഷ്ടമായി . ഈ തരംഗം 2020 മെയ് മുതൽ 2021 ജനുവരി വരെ നീണ്ടുനിന്നു. കൊവിഡ് വൈറസിന്റെ രണ്ടാം തരംഗത്തിലാണ് ഏറ്റവും കൂടുതൽ രോഗികൾ മരിച്ചത്. 11 മാസത്തോളം രണ്ടാം തരംഗം നീണ്ടു നിന്നു.. ഇതിനിടയിൽ 3.24 ലക്ഷം പേർ മരിച്ചു. രണ്ടാമത്തെ തരംഗത്തിന്റെ ഉച്ച സ്ഥായിയിൽ ഒരു ദിവസം ശരാശരി 4000 പേർ മരിച്ചു.