ആരോഗ്യത്തിന് ഭക്ഷണം മാത്രമല്ല, വെള്ളവും ഏറെ അത്യാവശ്യമാണ്. വെള്ളത്തിന്റെ കുറവ് പല ശാരീരിക പ്രവര്‍ത്തനങ്ങളേയും ദോഷകരമായി ബാധിയ്ക്കുന്നു. വൃക്കയടക്കമുള്ള പല അവയവങ്ങളുടേയും പ്രവര്‍ത്തനത്തെ ദോഷകരമായി ബാധിയ്ക്കുന്നു. മുടിയ്ക്കും ചര്‍മത്തിനുമെല്ലാം തന്നെ ഏറെ അത്യാവശ്യമാണ് വെള്ളം കുടിയ്ക്കുകയെന്നത്. വെളളം കുടിച്ചാലും പോരാ, അത് ആരോഗ്യകരമായി കുടിയ്ക്കാനുള്ള ചില വഴികളും ആയുര്‍വേദത്തില്‍ പറയുന്നുണ്ട്. ഇതില്‍ ഒന്നാണ് ആരോഗ്യാംബൂ.

ആരോഗ്യാംബു വെള്ളത്തെ തന്നെയാണ് പറയുന്നത്. വെളളം പ്രത്യേക രീതിയില്‍ തിളപ്പിച്ച് കുടിയ്ക്കുന്നതിനേയാണ് ഇത് പറയുന്നത്. വെള്ളമെടുത്ത് ഇത് തിളപ്പിച്ച് നാലിലൊന്നാക്കി വറ്റിച്ച് കുടിയ്ക്കുന്നതിനാണ് ആരോഗ്യാംബൂ എന്നു പറയുന്നത്. ആരോഗ്യത്തിന് ഏറെ നല്ലതാണ് ആയുര്‍വേദ പ്രകാരം ഇത്തരത്തില്‍ തയ്യാറാക്കുന്ന വെള്ളമെന്നു വേണം, പറയാന്‍. ഇത് നല്ല ദഹനത്തിന് സഹായിക്കുന്നു. പല ആരോഗ്യ പ്രശ്‌നങ്ങള്‍ക്കും ഇത്തരത്തില്‍ തയ്യാറാക്കുന്ന ജലം സഹായിക്കുന്നു.

ശ്വാസംമുട്ടല്‍, ചുമ, കഫം, പനി, ഗ്യാസ്, അനീമിയ, മൂലക്കുരു അഥവാ പൈല്‍സ്, വയറു വേദന തുടങ്ങിയ പല രോഗങ്ങള്‍ക്കും പരിഹാരമായി ഇത്തരത്തില്‍ തയ്യാറാക്കിയ വെള്ളം സഹായിക്കുമെന്ന് ആയുര്‍വേദം പറയുന്നു. ഇത്തരം പ്രശ്‌നങ്ങളുള്ളവര്‍ വെള്ളം നാലിലൊന്നാക്കി തിളപ്പിച്ച് വറ്റിച്ച് കുടിയ്ക്കുന്നതാണ് നല്ലത്. ഇത്തരം പ്രശ്‌നങ്ങളില്‍ നിന്നും ഇത് ഒരു പരിധി വരെ പരിഹാരം നല്‍കുന്നു.

ആയുര്‍വേദ പ്രകാരം വെള്ളം കുടിയ്ക്കുന്ന രീതിയും വിവരിയ്ക്കുന്നു. ഇതു പ്രകാരം ഒരുമിച്ച് വെള്ളം കുടിയ്ക്കുന്നതിനേക്കാള്‍ കുറേശെ വീതം പലപ്പോഴായി കുടിയ്ക്കണം. കുറേ വെള്ളം ഒരുമിച്ച് കുടിച്ചാല്‍ ഇത് ദഹനപ്രക്രിയയെ സഹായിക്കില്ലെന്ന് ആയുര്‍വേദം പറയുന്നു. ഇതു പോലെ രാവില തിളപ്പിച്ചു വച്ച വെള്ളം രാത്രിയിലും രാത്രി തിളപ്പിച്ചത് പിറ്റേന്നും കുടിയ്ക്കുന്നത് നല്ലതല്ലെന്നും പറയുന്നു. ദഹന പ്രശ്‌നങ്ങളുള്ളവര്‍ ഇടയ്ക്കിടെ, ഇതു പോലെ ഭക്ഷണ ശേഷവും ചൂടുവെള്ളം കുടിയ്ക്കുന്നത് ദഹനത്തെ സഹായിക്കും.

ഭക്ഷണം കഴിയ്ക്കുന്നതിന് തൊട്ടു മുന്‍പായി വെള്ളം കുടിയ്ക്കുന്നത് ഭക്ഷണത്തെ ദഹിപ്പിയ്ക്കാനുള്ള അഗ്നിയെ കെടുത്തും. ഭക്ഷണ താല്‍പര്യം കുറയും. ഇത് തടി കുറയ്ക്കാന്‍ ശ്രമിയ്ക്കുന്നവര്‍ക്ക് ആരോഗ്യകരമാണ്. ഇതു പോലെ ഭക്ഷണം കഴിയ്ക്കുന്നതിന് ഇടയില്‍ വെള്ളം കുടിയ്ക്കുന്നത് ശരീരം വല്ലാതെ തടിപ്പിയ്ക്കാതിരിയ്ക്കുന്നതിനും വല്ലാതെ മെലിയാതിരിയ്ക്കാനും സഹായിക്കുന്നു. തണുത്ത വെള്ളം കുടിയ്ക്കുന്നത് ക്ഷീണം, തല ചുറ്റല്‍ എന്നിവ മാറാന്‍ നല്ലതാണ്. ദഹന പ്രശ്‌നം, വാതം, ടോണ്‍സിലൈറ്റിസ്, പനി, കഴുത്തുവേദന, ഗ്യാസ് എന്നിവയുള്ളവര്‍ ചൂടുവെള്ളം ഉപയോഗിയ്ക്കുന്നതാണ് നല്ലതെന്ന് ആയുര്‍വേദം പറയുന്നു.