സംസ്ഥാനത്ത് കോവിഡ് വ്യാപനം രൂക്ഷമായ സാഹചര്യത്തിൽ ആരോഗ്യപ്രവർത്തകരുടെ ക്ഷാമം ഗുരുതര പ്രതിസന്ധി സൃഷ്ടിക്കുമെന്ന മുന്നറിയിപ്പുമായി കെജിഎംഒഎ. കൂടുതൽ ആരോഗ്യപ്രവർത്തകരെ അടിയന്തരമായി കൊവിഡ് ചികിത്സയ്ക്ക് നിയമിക്കണമെന്ന് മുഖ്യമന്ത്രിക്ക് അയച്ച കത്തിൽ കെജിഎംഒഎ ആവശ്യപ്പെട്ടു. ഏഴിന നിർദേശങ്ങളാണ് കത്തിൽ ചൂണ്ടിക്കാട്ടുന്നത്.

കൂടുതൽ ആരോഗ്യപ്രവർത്തകരെ അടിയന്തരമായി കൊവിഡ് ചികിത്സയ്ക്ക് നിയോഗിക്കണമെന്നതാണ് ഒരു നിർദേശം.കൂടുതൽ സിഎഫ്എൽടിസികൾ തുടങ്ങുന്നതിനേക്കാൾ നിലവിലുള്ളവയിൽ കിടക്കകൾ വർധിപ്പിക്കണം എന്നതാണ് മറ്റൊരു നിർദേശം. കൊവിഡ് ആശുപത്രികൾ, സിഎഫ്എൽടിസികൾ എന്നിവയിൽ കൃത്യമായ അഡ്മിഷൻ പ്രോട്ടോകോൾ നടപ്പാക്കണം, ഡൊമിസിലറി സെന്ററിലും സ്റ്റെപ്പ് ഡൗൺ സിഎഫ്എൽടിസികളിലും ടെലി കൺസൾട്ടേഷൻ വേണം,കാറ്റഗറി എ രോഗികൾ സിഎഫ്എൽടിസികളിൽ പ്രവേശിക്കുന്നില്ലെന്ന് ഉറപ്പു വരുത്തണം, പിജി പഠനത്തിന് പോയവരെ കോഴ്സ് പൂർത്തിയാകുന്ന മുറയ്ക്ക് ഡ്യൂട്ടിക്ക് നിയോഗിക്കണം, പതിനെട്ടിനും 45 നും ഇടയിലുള്ളവരുടെ വാക്സിനേഷന്് മുൻഗണനാ വിഭാഗങ്ങളെ നിശ്ചയിക്കണം തുടങ്ങിയവയാണ് കെജിഎംഒഎ മുന്നോട്ടുവയ്ക്കുന്ന മറ്റ് നിർദേശങ്ങൾ.