കോവിഡ് മഹാമാരിയുടെ രണ്ടാം തരംഗത്തിൽ തീക്ഷ്ണമായ രോഗ വ്യാപനം ആണ് നടന്നുവരുന്നത്. ഒരാളിൽ നിന്ന് പത്തോ പതിനഞ്ചോ പേരിലേക്ക് പെട്ടെന്ന് രോഗം വ്യാപിക്കുന്ന അവസ്ഥ. രോഗപ്രതിരോധത്തിനായി ബ്രേക്ക് ദ ചെയിൻ നിബന്ധനകൾ കർശനമായി പാലിക്കേണ്ടത് നാമോരോരുത്തരുടെയും കടമയാണ്. നിയന്ത്രണങ്ങൾ നടപ്പിലാക്കേണ്ടത് ഗവൺമെന്റിന്റെ ബാധ്യതയും. അടുത്ത രണ്ടാഴ്ചകൾ വളരെ നിർണായകമായതിനാൽ മൈക്രോ കണ്ടെയ്ൻമെന്റ്, കർഫ്യൂ പോലെയുള്ള കർശന നിയന്ത്രണങ്ങൾ ആവശ്യമാണെന്ന് ഐ എം എ സംസ്ഥാന പ്രസിഡന്റ്‌ ഡോ പി. റ്റി സക്കറിയാസ് പറഞ്ഞു . ആരോഗ്യപ്രവർത്തകർക്ക് രോഗബാധ വരാതെ നോക്കേണ്ടത് രോഗി പരിചരണത്തിന് ആവശ്യമായി വരുന്നു. സ്വയം കൃത്യമായ പരിരക്ഷ മാർഗ്ഗങ്ങൾ അവലംബിക്കേണ്ടത് ഓരോ ആരോഗ്യ പ്രവർത്തകരുടെയും കടമയാണ്. ഇതിനായി ഇന്ത്യൻ മെഡിക്കൽ അസോസിയേഷന്റെ നേതൃത്വത്തിൽ ഐ സേഫ് എന്ന പ്രോജക്ട് വഴി കൃത്യമായ പ്രതിരോധ പരിശീലന മാർഗങ്ങൾ ചെയ്തുവരുന്നു. ഇതിന്റെ ഫലമായാണ് കേരളത്തിൽ ആരോഗ്യപ്രവർത്തകരിൽ മരണനിരക്ക് ഏറ്റവും കുറഞ്ഞ അവസ്ഥയിൽ ഉള്ളത്. ചെറുകിട ആശുപത്രികളിലും ക്ലിനിക്കുകളിലും എല്ലാം രോഗികളെ പരിശോധിക്കാൻ പ്രാപ്തരാക്കുന്ന വിധത്തിൽ ഡോക്ടർമാർക്ക് രോഗപ്രതിരോധത്തിനുള്ള സാമഗ്രികൾ അടക്കം വിതരണം ചെയ്യാനും ഇന്ത്യൻ മെഡിക്കൽ അസോസിയേഷനു സാധിച്ചു. ഈ പ്രക്രിയ രണ്ടാം തരംഗത്തിന്റെ ഈ സമയത്തും തുടർന്നു കൊണ്ടുവരുന്നു.

ഇക്കഴിഞ്ഞ മാസങ്ങളിൽ തെരഞ്ഞെടുപ്പുമായി ബന്ധപ്പെട്ട് കോവിഡ് നിബന്ധനകൾ പാലിക്കുന്നതിൽ കാര്യമായ വീഴ്ച നമ്മുടെ ഭാഗത്തുനിന്നുണ്ടായി. അതിന്റെ പരിണതഫലം കൂടിയാണ് ഇന്നത്തെ തീവ്ര രോഗവ്യാപനം. ശരിയായ വിധത്തിൽ മാസ്‌ക് ധരിക്കുന്നതിനും ശാരീരിക അകലം പാലിക്കുന്നതിനും വീഴ്ചവരുത്തിയ സന്ദർഭങ്ങൾ നിരവധിയാണ്. ഇതോടൊപ്പമാണ് ആഘോഷങ്ങളും പൂരങ്ങളും അതുപോലെ ആൾക്കൂട്ടങ്ങൾ ഉണ്ടാകുന്ന അവസ്ഥകളും; രോഗബാധയ്ക്ക്, രോഗവ്യാപനത്തിന് ഏറ്റവും അനുകൂലമായ സാഹചര്യം. ഇത് ഒഴിവാക്കുന്നതിൽ നമുക്ക് പറ്റിയ വീഴ്ച തന്നെയാണ് രണ്ടാം തരംഗം ഇത്രയും രൂക്ഷമാക്കിയത്. ഇനിയെങ്കിലും കർശനമായ നിയന്ത്രണ നടപടികൾ ഉണ്ടായേ മതിയാകൂ.