കേരളത്തിൽ ആരോഗ്യ വകുപ്പ് ആന്റിജൻ കിറ്റുകൾ തിരിച്ചു വിളിച്ചു. ആൽപൈൻ കമ്പനിയുടെ കിറ്റുകളാണ് തിരികെ എടുത്തത്. പരിശോധിക്കുന്ന സാമ്പിളിൽ കൂടുതലും പോസിറ്റീവ് കണ്ടെത്തിയ സാഹചര്യത്തിലാണ് നടപടി.

30 ശതമാനത്തിൽ അധികം പോസിറ്റീവ് കേസുകൾ കണ്ടെത്തിയതോടെയാണ് ആന്റിജൻ കിറ്റുകൾ തിരികെ എടുക്കുന്നത്. കിറ്റുകൾക്ക് ഗുണ നിലവാര പ്രശ്‌നം ഉണ്ടാകാമെന്നാണ് ആരോഗ്യ വകുപ്പിന്റെ വിലയിരുത്തൽ. പിസിആർ പരിശോധകളുടെ എണ്ണം കൂട്ടാൻ ലാബുകളിൽ ഷിഫ്റ്റുകളുടെ എണ്ണം കൂട്ടാനും ആരോഗ്യ വകുപ്പ് നിർദേശം നൽകി. ഒന്നിലധികം സാമ്പിളുകൾ ഒരുമിച്ച് പരിശോധിക്കുന്ന പൂൾഡ് പിസിആർ തുടങ്ങാനും നിർദേശം നൽകിയിട്ടുണ്ട്.