ഡൽഹിയിൽ മാത്രമല്ല രാജ്യത്തുടനീളം കൊവിഡ് വാക്‌സിൻ സൗജന്യമായി നൽകുമെന്ന് കേന്ദ്ര ആരോഗ്യമന്ത്രി ഹർഷ വർധൻ. കൊവിഡ് മുന്നണി പോരാളികൾക്കും ആരോഗ്യ പ്രവർത്തകർക്കുമാണ് ആദ്യ ഘട്ടത്തിൽ വാക്സിൻ നൽകുക. മറ്റുള്ളവർക്ക് വാക്സിൻ നൽകുന്ന കാര്യം ഉടൻ തീരുമാനിക്കുമെന്നും മന്ത്രി പറഞ്ഞു. കൊവിഡ് വാക്സിൻ സംബന്ധിച്ച് തെറ്റിദ്ധാരണയുടെ ആവശ്യമില്ലെന്നും മന്ത്രി കൂട്ടിച്ചേർത്തു.കൊവിഡ് വാക്‌സിൻ ഡ്രൈ റൺ നടത്തുന്നത് അവലോകനം ചെയ്യുന്നതിനായി ഡൽഹിയിലെ ജിടിബി ആശുപത്രി സന്ദർശിച്ച ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. രാജ്യത്തെ എല്ലാ സംസ്ഥാനങ്ങളിലും കേന്ദ്ര ഭരണ പ്രദേശങ്ങളിലും ഇന്നാണ് കൊവിഡ് വാക്‌സിൻ ഡ്രൈ റൺ നടത്തുന്നത്.