വേലിയിൽ കിടന്ന പാമ്പിനെ എടുത്ത് മടിയിൽ വയ്ക്കരുതെന്നാണ് പഴഞ്ചൊല്ല്.  എന്നാൽ തിരുവനന്തപുരം സ്വദേശിയായ ഭുവനചന്ദ്രൻനായർ പാമ്പിനെ എടുത്ത് കഴുത്തിൽ ചുറ്റിയത് പൊല്ലാപ്പായി. തിരുവനന്തപുരത്തെ എൻജിനീയറിം​ഗ് കോളേജ് വൃത്തിയാക്കുന്നതിനിടയിലാണ് ഭുവനചന്ദ്രൻ നായർ മലമ്പാമ്പിനെ കണ്ടത്. മലമ്പാമ്പിനെ എടുത്ത് കഴുത്തിൽ ചുറ്റി പരമശിവന്റെ ഭാവത്തിൽ നിൽക്കാൻ ശ്രമിച്ചു. ഇത് മൊബൈലിൽ പകർത്താൻ കൂടെയുള്ളവരോട് പറയുകയും ചെയ്തു. എന്നാൽ സം​ഗതി പൊല്ലാപ്പായി. മലമ്പാമ്പ് ഭുവനചന്ദ്രന്റെ കഴുത്തിൽ ഇറുക്കി ചുറ്റിപ്പിടിച്ചു. ശ്വാസം കിട്ടാതെ ഭുവനചന്ദ്രൻനായർ മരണവെപ്രാളം കാട്ടിയപ്പോഴാണ് സം​ഗതി സീരിയസ്സാണെന്ന് കാഴ്ചക്കാർക്ക് മനസ്സിലായത്. അവർ ബലമായി മലമ്പാമ്പിനെ കഴുത്തിൽ നിന്നും  ഒരുവിധത്തിൽ പിടിവിടുവിപ്പിച്ചു. ഭുവനചന്ദ്രനെ  വെട്ടിലാക്കിയ മലമ്പാമ്പിനെ നാട്ടുകാർ ചേർന്ന് ചാക്കിലാക്ക് ഫോറസ്റ്റ്കാരെ ഏൽപ്പിക്കുകയായിരുന്നു.