ലോകത്തിലെ ഏറ്റവും വലിപ്പം കൂടിയ ചക്ക എന്നതിന്റെ മുൻകാല റെക്കോർഡുകളെ പൊളിച്ചടുക്കി വയനാട്ടിലെ ഒരു ഭീമൻ ചക്ക. 52.350 കിലോഗ്രാം വലിപ്പമുള്ള ഈ അതിഭീമൻ വിളഞ്ഞത് വയനാട്ടിലെ മാനന്തവാടിയിലാണ്.മാനന്തവാടി താലൂക്കിലെ തവിഞ്ഞാല്‍ പഞ്ചായത്തിലെ മൂന്നാം വാര്‍ഡില്‍ കാപ്പാട്ടുമല വൈഡ്മാന്‍ നിലയത്തിൽ താമസിച്ചുവരുന്ന മുംബൈ മലയാളിയും കണ്ണൂര്‍ കാപ്പാട് സ്വദേശിയുമായ വിനോദാണ് ഭീമൻ ചക്കയെ പൊന്നുപോലെ വളർത്തിയെടുത്തത്. കാണുന്നവരൊക്കെ അത്ഭുതപ്പെട്ടുപോകുന്ന ഭീമൻ സർവകാല റെക്കോർഡുകൾ ഭേദിച്ചു എന്നറിഞ്ഞ് ഇദ്ദേഹം ചക്കമഹാത്മ്യം വിലയിരുത്താനായി ലിംക ബുക്ക്  ഓഫ് റെക്കോർഡ്‌സ് അധികൃതരെ വിവരമറിയിച്ചിട്ടുണ്ട്. നിലവിലെ റെക്കോഡ് 42.72 ആണ്. 77 സെന്റിമീറ്റര്‍ നീളവും 117 സെന്റിമീറ്റര്‍ ചുറ്റളവുമുള്ള ഈ ചക്ക പ്രകൃതിയുടെ അത്ഭുതമാണെന്നാണ് പ്രദേശവാസികൾ ഒരേ സ്വരത്തിൽ പറയുന്നത്.