ലോക്ക്ഡൗൺ നിലനിൽക്കുന്നതിനാൽ കുടിയേറ്റ തൊഴിലാളികൾക്ക് ഭക്ഷണവും അഭയവും നൽകാൻ രാഹുൽ ഗാന്ധിയുടെ ആഹ്വാനം. ഇക്കാര്യം ട്വിറ്ററിലൂടെയാണ് രാഹുൽ ഗാന്ധി അറിയിച്ചത്. പൊതുജനങ്ങളോടും പാർട്ടി പ്രവർത്തകരോടുമാണ്   കോൺഗ്രസ് നേതാവ് ഇക്കാര്യം 
ആഹ്വാനം ചെയ്തിരിക്കുന്നത് . 

ബുധനാഴ്ച മുതൽ രാജ്യത്തിന്റെ വിവിധ ഭാഗങ്ങളിലുള്ള റോഡുകളിൽ കുടിയേറ്റ തൊഴിലാളികൾ കിലോ മീറ്ററുകൾ താണ്ടുന്ന ദൃശ്യങ്ങളാണ് കാണുന്നത് . സമ്പൂർണ ലോക്ക്ഡൗൺ പ്രഖ്യാപിച്ചത് ഏറ്റവും കൂടുതൽ ബാധിച്ചിരിക്കുന്നത് കുടിയേറ്റ  തൊഴിലാളികളെയാണ് . ദിവസവേതനത്തിൽ തൊഴിൽ ചെയ്ത് അതാത് ദിവസത്തെ അന്നം കണ്ടെത്തിയിരുന്ന ഇവർക്ക് ലോക്ക്ഡൗൺ  പ്രഖ്യാപിച്ചതോടെ തൊഴിൽ നഷ്ടമായി . സ്വന്തം ഗ്രാമങ്ങളിലേക്ക് പോകുന്നതിന് പൊതുഗതാഗത സംവിധാനങ്ങളുമില്ല . പിഞ്ചുകുഞ്ഞുങ്ങളേയും തോളിലേന്തി അഞ്ഞൂറും അറുനൂറും കിലോ മീറ്റുകളാണ് ഇവർ താണ്ടുന്നത്. ഇതിന്റെ പശ്ചാത്തലത്തിലാണ് രാഹുൽ ഗാന്ധിയുടെ ആഹ്വാനം.