തിരുവനന്തപുരത്ത് കോവിഡ് 19  നിരീക്ഷണത്തിൽ കഴിയുന്നവരുടെ വീടുകളിൽ പോസ്റ്റർ പതിപ്പിക്കാൻ തീരുമാനമായി. നിരീക്ഷണം സംബന്ധിച്ച് നിരവധി പരാതികള്‍ ഉയര്‍ന്ന സാഹചര്യത്തിലാണ് ജില്ലാ ഭരണകൂടത്തിന്റെ ഈ തീരുമാനം.
നിരീക്ഷണ കാലാവധി പൂര്‍ത്തിയാക്കാതെ പലരും വീടുകളില്‍ നിന്ന് പുറത്തിറങ്ങുന്നുവെന്ന പരാതി നിരവധി തവണ ലഭിച്ചതിനെ തുടർന്ന് ജില്ലാതല അവലോകന യോഗത്തിലാണ്  ഇതു സംബന്ധിച്ച് ധാരണയായത്. 

അതേസമയം, ശ്രീചിത്രയിലെ ഡോക്ടറുടെ സമ്പര്‍ക്ക ലിസ്റ്റിലുള്ള മുഴുവന്‍ പേരുടെയും ഫലം നെഗറ്റീവായിട്ടുണ്ട്. 179 പേരാണ് ലിസ്റ്റിലുണ്ടായിരുന്നത്. ഇതില്‍ 55 പേര്‍ ഹൈ റിസ്കില്‍ ആയിരുന്നു. ശ്രീചിത്രയിലെ ഡോക്ടര്‍മാര്‍ ഉള്‍പ്പെടെയുള്ളവരായിരുന്നു ലിസ്റ്റില്‍ ഉണ്ടായിരുന്നത്.