കൊറോണ വൈറസ് പടർന്നു പിടിക്കുന്നതിന്റെ പശ്ചാത്തലത്തിൽ ആരോഗ്യ സര്‍വ്വകലാശാല മാര്‍ച്ച്‌ 31 വരെയുള്ള എല്ലാ പരീക്ഷകളും മാറ്റി. പുതുക്കിയ തീയ്യതി പിന്നീട് അറിയിക്കുമെന്ന് ആരോഗ്യ സര്‍വ്വകലാശാല അറിയിച്ചു. കേന്ദ്ര സർക്കാരിന്റെ നിർദ്ദേശത്തെ തുടർന്നാണ് ആരോഗ്യ സർവകലാശാലയുടെ ഈ നടപടി. കൊറോണ വൈറസ് പടരുന്ന സാഹചര്യത്തിൽ സിബിഎസ്‌ഇ അടക്കമുള്ള എല്ലാ പരീക്ഷകളും മാറ്റണമെന്ന് കേന്ദ്രസര്‍ക്കാര്‍ കഴിഞ്ഞ ദിവസം നിര്‍ദ്ദേശിച്ചിരുന്നു. സി ബി എസ് ഇ യുടെ 10, 12 ക്ലാസ് പരീക്ഷകളും യു ജി സി, എ ഐസി ടി ഇ, നാഷണല്‍ ഇന്‍സ്റ്റിറ്റ്യൂട്ട് ഓഫ് ഓപ്പണ്‍ സ്‌കൂളിംഗ്, ജെ ഇ ഇ മെയിന്‍ പരീക്ഷകള്‍ എന്നിവ കേന്ദ്ര നിര്‍ദ്ദേശത്തെ തുടര്‍ന്ന് കഴിഞ്ഞ ദിവസം മാറ്റിയിരുന്നു. അതേസമയം കേരളത്തില്‍ എസ്‌എസ്‌എല്‍സി ഹയര്‍ സെക്കണ്ടറി പരീക്ഷകള്‍ക്ക് മാറ്റമില്ല.