തലസ്ഥാനത്ത് കെഎസ്ആർടിസി ജീവനക്കാരുടെ മിന്നൽ പണിമുടക്കിൽ പ്രതിഷേധിച്ച് യാത്രക്കാർ. ദീർഘ-ദൂര സർവ്വീസുകൾ ജീവനക്കാർ തടഞ്ഞതോടെ യാത്രക്കാർ ദുരിതത്തിലായി. ഇതോടെ യാത്രക്കാര്‍ റോഡില്‍ ഇറങ്ങി പ്രതിഷേധിച്ചു. സ്വകാര്യ ബസ് റൂട്ട് മാറി ഓടിയത് ചോദ്യം ചെയ്ത സിറ്റി ഡിടിഒയെ അകാരണമായി പോലീസ് അറസ്റ്റ് ചെയ്‌തെന്ന് ആരോപിച്ചാണ് സർവ്വീസുകള്‍ ജീവനക്കാര്‍ നിർത്തിവെച്ചത്. നഗരത്തിൽ ഗതാഗതതടസ്സം മൂന്ന് മണിക്കൂറിലേറെ പിന്നിടുമ്പോഴും ഗതാഗതകുരുക്കും യാത്രാ ദുരിതവും തുടരുകയാണ്. ആറ്റുകാൽ ക്ഷേത്രത്തിലേക്ക് സൗജന്യമായി സമാന്തര സർവ്വീസ് നടത്തിയ സ്വകാര്യ ബസ് കെഎസ്ആർടിസി ഡിടിഒ തടഞ്ഞതിലും സ്വകാര്യ ബസ്സിലെ ഭിന്നശേഷിക്കാരനായ ജീവനക്കാരെ ഡിടിഒ മ‍ർദ്ദിച്ചതിലും പരാതിയുണ്ട്. ഈ സംഭവത്തില്‍ എടിഒയെ പോലീസ് കസ്റ്റഡിയിലെടുത്തതോടെയാണ് സമരം തുടങ്ങിയത്. ആദ്യം സിറ്റി സർവ്വീസുകളാണ് നിർത്തിവെച്ചതെങ്കിലും പിന്നീട് തമ്പാനൂരിൽ നിന്നുള്ള ദീർഘദൂര സർവ്വീസുകളും ജീവനക്കാർ നിർത്തിവെച്ചു.