മുടിവെട്ടിയത് കുറഞ്ഞ് പോയതിന്റെ പേരില്‍ പിതാവിനെ കയറ്റാതെ 12 കാരന്‍ കാര്‍ അകത്ത് നിന്ന് പൂട്ടി. പൊലിസ്  നടത്തിയ അനുനയ നീക്കത്തിനൊടുവിലാണ് ഡോര്‍ തുറക്കാനായത്.ഇന്ന് വൈകിട്ട് 5 മണിയോടെ തൊടുപുഴയിയാണ് സംഭവം.  നെയ്യശ്ശേരി സ്വദേശിയും മൂന്ന് മക്കളും തൊടുപുഴ പോലീസ് സ്‌റ്റേഷന് സമീപത്തെ കടയില്‍ മുടിവെട്ടാന്‍ എത്തിയതായിരുന്നു. മുടി വെട്ടിയ ശേഷം കുട്ടികളെ വാഹനത്തിലിരുത്തി പിതാവ് സമീപത്തെ കടയില്‍ പോയി. തിരിച്ചെത്തിയപ്പോള്‍ പിന്‍സീറ്റിലിരുന്ന 12 വയസുകാരന്‍ കാറിന്റെ ഡോര്‍ തുറക്കാന്‍ തയ്യാറായില്ല.

ഗത്യന്തരമില്ലാതെ വന്നതോടെ പിതാവ് പോലീസിന്റെ സഹായം തേടുകയായിരുന്നു. പൊലീസ് എത്തി ഏറെ നേരം സംസാരിച്ച ശേഷമാണ് കുട്ടി കാറിന്റെ ലോക്ക് മാറ്റാന്‍ തയ്യാറായത്. മുടിവെട്ടിയപ്പോള്‍ അളവ് കൂടിപ്പോയതാണ് പ്രശ്‌നമായത്. കുട്ടിയെ കൗണ്‍സിലിങിന് കൊണ്ടുപോകാനായിരുന്നു പൊലിസിന്റെ  ഉപദേശം.