ഗൂഗിൾ പ്ലേസ്റ്റോറില്‍ നിന്നും സുരക്ഷാ വീഴ്ച കണ്ടെത്തിയ 29 ആപ്ലിക്കേഷനുകള്‍ നീക്കം ചെയ്തത് ഈയടുത്താണ്. ഇപ്പോഴിതാ ആൻഡ്രോയിഡ് മാർക്കറ്റിൽ നിന്നും സെർച്ച് ഭീമൻ ഒരു ആപ്പിനെക്കൂടി എടുത്തുകളഞ്ഞിരിക്കുന്നു. ദേശ വിരുദ്ധ പ്രവർത്തനങ്ങൾ നടത്തുന്നു എന്ന് ചൂണ്ടിക്കാണിച്ചാണ് ഈ നിരോധനം. പഞ്ചാബ് മുഖ്യമന്ത്രി അമരീന്ദർ സിംഗിന്റെ നിർദേശമനുസരിച്ച് "2020 സിഖ് റെഫറണ്ടം" എന്ന് പേരുള്ള ആപ്പിനെയാണ് ആന്റി ഇന്ത്യ എന്ന് സൂചിപ്പിച്ച് ഗൂഗിൾ നീക്കം ചെയ്തത്.ഇന്ത്യയിലും വിദേശത്തും നിരോധിച്ച "സിഖ്‌സ് ഫോർ ജസ്റ്റിസ്" എന്ന സംഘടന ഈ ആപ്പ് ഉപയോഗിച്ച് പഞ്ചാബിന്റെ വിഭജനത്തിനു വേണ്ടി ക്യാമ്പയിൻ ചെയ്യുന്നു എന്ന് കണ്ടെത്തിയതിനെത്തുടർന്നാണ് ആപ്പ് നീക്കം ചെയ്തത്. ഇപ്പോൾ ഇന്ത്യയിലെ മൊബൈൽ ഉപയോക്താക്കൾക്ക് പ്ലേസ്റ്റോറിൽ ഈ ആപ്പ് കാണാനാവില്ല. 'ICETECH' നിർമ്മിച്ച ആപ്പിന് മുഖ്യമന്ത്രിയുടെ നിർദേശമനുസരിച്ച് ഡിജിപിയും സെൻട്രൽ സെക്യൂരിറ്റി ഏജൻസിയും ചേർന്നാണ് കടിഞ്ഞാണിട്ടത്. ഗൂഗിളിനോടും ഇക്കാര്യത്തിൽ ഇടപെടാൻ മുഖ്യമന്ത്രി ആവശ്യപ്പെട്ടിരുന്നു.