ആധാർ കാര്‍ഡിലെ മേല്‍വിലാസം ഇനി എളുപ്പത്തില്‍ മാറ്റാം. ആധാര്‍ കാര്‍ഡില്‍ മേല്‍വിലാസം മാറ്റുന്നതിന് നിലവിലുണ്ടായിരുന്ന നിബന്ധനകള്‍ ലഘൂകരിക്കാന്‍ കേന്ദ്രസര്‍ക്കാര്‍ തീരുമാനിച്ചു. പുതിയ ഉത്തരവ് പ്രകാരം ആധാര്‍ കാര്‍ഡില്‍ നിലവില്‍ താമസിക്കുന്ന സ്ഥലത്തെ മേല്‍വിലാസം ചേര്‍ക്കുന്നതിന് കാര്‍ഡുടമ സ്വയം സാക്ഷ്യപ്പെടുത്തിയ അപേക്ഷ മാത്രം നല്‍കിയാല്‍ മതി. അന്യ സംസ്ഥാനങ്ങളില്‍ ജോലി ചെയ്യുന്ന തൊഴിലാളികള്‍ക്കാണ് പുതിയ തീരുമാനം ഏറ്റവുമധികം സഹായകരമാകുക. നിലവില്‍ ആധാര്‍ കാര്‍ഡിലെ മേല്‍വിലാസം മാറ്റണമെങ്കില്‍ അതേ മേല്‍വിലാസത്തിലുള്ള പാസ്‍പോര്‍ട്ട്, റേഷന്‍ കാര്‍ഡ്, തിരിച്ചറിയല്‍ കാര്‍ഡ്, ഡ്രൈവിങ് ലൈസന്‍സ്, ബാങ്ക് പാസ്‍ബുക്ക്, വാട്ടര്‍ ബില്‍, ഇലക്ട്രിസിറ്റി ബില്‍ തുടങ്ങിയ രേഖകളില്‍ ഏതെങ്കിലുമൊന്ന് ഹാജരാക്കേണ്ടതുണ്ട്.ഇതു കാരണം ആധാറിലെ മേല്‍വിലാസം മാറ്റുന്നതിന് ഏറെ ബുദ്ധിമുട്ടിയിരുന്നത് ഇതരസംസ്ഥാനക്കാരായ തൊഴിലാളികളാണ്. ഇവര്‍ക്ക് ജോലി ചെയ്യുന്ന സംസ്ഥാനത്ത് ബാങ്ക് അക്കൗണ്ട് തുറക്കുന്നതിന് അതേ സ്ഥലത്തെ മേല്‍വിലാസത്തിലുള്ള ആധാര്‍ കാര്‍ഡ് ബാങ്കുകള്‍ നിര്‍ബന്ധമാക്കിയിരുന്നു.

എന്നാല്‍ നിബന്ധനകളില്‍ ഇളവ് വരുത്തിയതോടെ അന്യ സംസ്ഥാന തൊഴിലാളികള്‍ക്ക് ഇനി യാതൊരു രേഖകളുമില്ലാതെ സ്വയം സാക്ഷ്യപ്പെടുത്തിയ അപേക്ഷയിലൂടെ ആധാറിലെ മേല്‍വിലാസം മാറ്റാം. താമസിക്കുന്ന സ്ഥലത്തെ പുതിയ മേല്‍വിലാസമാണ് ആധാറില്‍ ചേര്‍ക്കുക. ബാങ്ക് അക്കൗണ്ട് ആരംഭിക്കുന്നതിന് ഉള്‍പ്പെടെ പുതിയ മേല്‍വിലാസത്തിലുള്ള ആധാര്‍ ഉപയോഗിക്കാനുമാകും. അതേ സമയം നേരത്തെ രേഖപ്പെടുത്തിയിട്ടുള്ള ജന്‍മനാട്ടിലെ മേല്‍വിലാസം ആധാറില്‍ നിലനില്‍ക്കും.