ഉപതിരഞ്ഞെടുപ്പ് സമയത്ത് കൃത്യമായിരുന്ന കുടിവെള്ളം തിര‍ഞ്ഞെടുപ്പ് കഴിഞ്ഞതോടെ മുടങ്ങിയതായി മനുഷ്യാവകാശകമ്മീഷനിൽ പരാതി. തിരുവനന്തപുരം നന്തൻകോട് കനകന​ഗർ സ്വദേശികളാണ് മനുഷ്യാവകാശ കമ്മീഷനിൽ പരാതി നൽകിയത്. ജല അതോറിറ്റി എക്സിക്യൂട്ടീവ് എൻജീനിയറോട്നാല് ആഴ്ചയ്ക്കകം മറുപടി നൽകണമെന്ന് മനുഷ്യാവകാശകമ്മീഷൻ അധ്യക്ഷൻ ജസ്റ്റിസ് ആന്റണി ഡൊമിനിക്ക് ഉത്തരവിട്ടു. കനകന​ഗർ നിവാസികളെ പ്രതിനിധീകരിച്ച് എസ്. എസ്. അരുൺകുമാറാണ് പരാതി നൽകിയത്. കനകന​ഗറിലെ രണ്ട് ഫ്ളാറ്റുകളിലേയ്ക്ക് വെള്ളം വഴിതിരിച്ചു വിടുന്നതുകൊണ്ടാണ് കുടിവെള്ളം മുട്ടിയതെന്ന് അരുൺകുമാറിന്റെ പരാതിയിൽ പറയുന്നു. കുടിവെള്ളം ലഭിക്കാത്തതിനെപ്പറ്റി ന​ഗരസഭ കൗൺസിലറോട് പരാതി പറ‍ഞ്ഞപ്പോൾ ന​ഗരസഭയല്ല കുടിവെള്ളം എത്തിക്കുന്നതെന്നായിരുന്നു കൗൺസിലറുടെ മറുപടിയെന്നും പരാതിയിൽ പറയുന്നു.