തിരുവനന്തപുരം എസ് എ ടി ആശുപത്രിയിലും ഹെമറ്റോളജി ഒ പി ആരംഭിച്ചു. മെഡിക്കൽ കോളേജ് ആശുപത്രിയിലെ ഒപിയിൽ ചികിത്സയ്ക്കെത്തുന്ന എസ് എ ടി ആശുപത്രിയിൽ നിന്നുള്ള രോഗികളുടെ ബുദ്ധിമുട്ട് കണക്കിലെടുത്താണ് പുതിയ ഒപി ആരംഭിച്ചത്. ഗൈനക്കോളജി - ഹെമറ്റോളജി വിഭാഗങ്ങളുടെ സംയുക്തമായ മേൽനോട്ടത്തിലാണ് ഒ പി പ്രവർത്തിക്കുന്നത്. ആശുപത്രിയിൽ എത്തുന്ന നിരവധി ഗർഭിണികൾക്ക് ഹെമറ്റോളജി പ്രശ്നങ്ങൾ കണ്ടു വരാറുണ്ട്. എസ് എ ടി യിൽ കിടക്കുന്ന ഹൈ റിസ്ക് രോഗികളെപ്പോലും മെഡിക്കൽ കോളേജ് ആശുപത്രിയിലെ ഒ പി യിൽ കൊണ്ടുവരുമ്പോൾ സ്വാഭാവികമായും അവർക്ക് മുൻഗണന നൽകേണ്ടി വരും. ഇത് ചികിത്സ കാത്തു നിൽക്കുന്ന മറ്റു രോഗികൾക്ക് പ്രയാസമുണ്ടാക്കാറുണ്ട്. ഈ സാഹചര്യത്തിലാണ് എസ് എ ടിയിൽ പുതിയ സ്പെഷ്യാലിറ്റി ക്ലിനിക്ക് ആരംഭിച്ചത്. എല്ലാ ബുധനാഴ്ചയും രാവിലെ 10 മുതൽ ഒരു മണി വരെയാണ് പുതിയ ഒപി പ്രവർത്തിക്കുന്നത്. മെഡിക്കൽ കോളേജ് ആശുപത്രിയിലെ ഹെമറ്റോളജി വിഭാഗം കൈകാര്യം ചെയ്യുന്ന ഡോ ശ്രീനാഥിന്റെ നേതൃത്വത്തിലാണ് ഒ പി പ്രവർത്തിക്കുന്നത്. ഗൈനക്കോളജി വിഭാഗത്തിലെ ഡോക്ടർമാരും ഒപിയിലുണ്ടാകും.. ബുധനാഴ്ച പുതിയ ഒപിയുടെ പ്രവർത്തനം ആരംഭിച്ചു. മെഡിക്കൽ കോളേജ് ആശുപത്രിയിലെ ഹെമറ്റോളജി വിഭാഗത്തിന്റെ ചുമതല വഹിക്കുന്ന ഡോ ശ്രീനാഥ്, ഗൈനക്കോളജി വിഭാഗം മേധാവി ഡോ നിർമ്മല തുടങ്ങിയവർ പുതിയ ഒപിയുടെ പ്രവർത്തനത്തിൽ പങ്കാളികളായി.