വാട്സാപ്പ് ചാറ്റുകൾ നിശബ്ദമാക്കി വെക്കാനുള്ള സൗകര്യം ഏറെ നാളുകളായി വാട്‌സാപ്പിൽ ലഭ്യമാണ്. ഒരു വർഷം വരെ നിശബ്ദമാക്കിവെക്കാനുള്ള സൗകര്യമാണ് ഇതുവരെ ഉണ്ടായിരുന്നത്. എന്നാൽ ഇനിമുതൽ വാട്‌സാപ്പ് ഉപയോക്താക്കൾക്ക് ചാറ്റുകൾ എന്നെന്നേക്കുമായി മ്യൂട്ട് ചെയ്ത് വെക്കാം. ട്വിറ്ററിലൂടെയാണ് വാട്‌സാപ്പ് ഇക്കാര്യം അറിയിച്ചത്.

പുതിയ ഫീച്ചർ ലഭിക്കുന്നതിനായി വാട്‌സാപ്പ് പ്രത്യേകം അപ്‌ഡേറ്റ് ചെയ്യേണ്ടതില്ല. കാരണം സെർവർ തലത്തിലുള്ള അപ്‌ഡേറ്റിലൂടെയാണ് ഈ സൗകര്യം വാട്‌സാപ്പിലെത്തുന്നത്. എങ്കിലും ഏറ്റവും പുതിയ വാട്‌സാപ്പ് പതിപ്പാണ് ഉപയോഗിക്കുന്നത് എന്ന് ഉറപ്പുവരുത്തുക. അല്ലെങ്കിൽ അപ്‌ഡേറ്റ് ചെയ്യുക. വാട്‌സാപ്പിലെ മ്യൂട്ട് നോട്ടിഫിക്കേഷൻസ് ഓപ്ഷനിൽ ഒരു വർഷം വരെ മ്യൂട്ട് ചെയ്തുവെക്കാനുള്ള ഓപ്ഷന് പകരമായാണ് ‘മ്യൂട്ട് ഓൾവേയ്‌സ്’ ഉൾപ്പെടുത്തിയിരിക്കുന്നത്.