പെട്രോൾ വില ഉയരുന്നതിനുപിന്നാലെ നിത്യോപയോഗ സാധനങ്ങൾക്കും വില കുതിച്ചു പൊങ്ങുന്നു. കോവിഡ്​ കാലത്തെ വിലക്കയറ്റം പിടിച്ചുനിർത്താൻ ഒരു നടപടിയും ഉണ്ടാകുന്നില്ല. 

നിത്യോപയോഗ പലവ്യഞ്ജനങ്ങളായ മുളക് മല്ലി വൻപയർ തുടങ്ങിയവയ്‌ക്കെല്ലാം വിലകൂടി. ഒരുകിലോ പിരിയൻ മുളകിന്​ 310 വരെയായിട്ടുണ്ട്​. മല്ലി- 90, വൻപയർ- 90, ചെറുപയർ -135, കടല -90, വെളിച്ചെണ്ണ- 220, പഞ്ചസാര -38, വെളുത്തുള്ളി -110 എന്നിങ്ങനെ പോകുന്നു വില. അടിക്കടിയുള്ള ഇന്ധനവിലയും സാധനങ്ങളുടെ ലഭ്യതക്കുറവുമാണ്​​ വിലവർധനക്ക്​​ കാരണമായി വ്യാപാരികൾ പറയുന്നത്​.

എല്ലാ പലവ്യഞ്ജ​നങ്ങൾക്കും വില വർധിച്ചിട്ടുണ്ട്​. സപ്ലൈകോ മാർക്കറ്റുകളിൽ സബ്​സിഡി നിരക്കിലുള്ള സാധനങ്ങളും ലഭ്യമല്ല. കടകളിൽ സാധനങ്ങളുടെ വില നിശ്ചയിച്ചുള്ള ബോര്‍ഡുകളും കാണാനില്ല. പരിശോധനകൾ നടത്താത്തതും വിലക്കയറ്റത്തിന്​ കാരണമാകുന്നു.