ലോകത്തെ നടുക്കുന്ന കൊറോണ വൈറസ് ഭീതി കാരണം വാങ്ങാൻ ആളില്ലാത്തതിനാൽ മെക്സിക്കോവിൽ നിന്നും 18 രാജ്യങ്ങളിലേക്കുള്ള കൊറോണ ബിയർ ഉൽപ്പാദനം കമ്പനി നിർത്തിവെച്ചു. രോഗ വ്യാപനം തടയുന്നതിനായി ഏപ്രില്‍ 30 വരെ അവശ്യ സാധനങ്ങള്‍ ഒഴികെയുള്ള എല്ലാ ഉത്പാദനവും താല്‍ക്കാലികമായി നിര്‍ത്തിവെക്കാന്‍ മെക്സിക്കന്‍ സര്‍ക്കാര്‍ ഉത്തരവിട്ടിരുന്നു. ഇതിന്റെ കൂടി ഭാഗമായാണ് ബിയർ ഉത്പാദനം നിർത്തിവെച്ചത്. കോവിഡ് രോഗം പരത്തുന്ന വൈറസിനും ബിയറിനും ഒരേ പേരായതിനാൽ അമേരിക്കയിലെ ബഹുഭൂരിപക്ഷം ഉപഭോക്താക്കളും ഈ ബ്രാന്റിലുള്ള ബിയർ വേണ്ടെന്ന് വെച്ചിരുന്നു. ചുരുങ്ങിയ കാലത്തിനുള്ളിൽ കമ്പനിയ്ക്ക് വൻ നഷ്ടമാണ് ഉണ്ടായത്. പത്ത് വർഷത്തിനിടെ സംഭവിച്ച ഏറ്റവും വലിയ പതനമാണ് തങ്ങൾ നേരിടുന്നതെന്ന് കമ്പനി തുറന്ന് സമ്മതിച്ചു. കൊറോണ ഭീതി ഒഴിയുമ്പോൾ ഉൽപ്പന്നം പൂർവാധികം ഭംഗിയായി പുറത്തിറക്കുമെന്നും കമ്പനി അറിയിച്ചു.