പ്രാരംഭ ഓഹരി വില്പനയിലൂടെയുള്ള (ഐ.പി.ഒ)​ മൂലധന സമാഹരണം 2019ൽ നേരിട്ടത് 60 ശതമാനം ഇടിവ്. 2018ൽ 30,​959 കോടി രൂപ കിട്ടിയപ്പോൾ ഈ വർഷം ലഭിച്ചത് 12,​362 കോടി രൂപ മാത്രം. 16 സ്ഥാപനങ്ങളാണ് ഈ വർഷം ഐ.പി.ഒ നടത്തിയത്. 2018ൽ 24 കമ്പനികൾ ഐ.പി.ഒ നടത്തി ഓഹരി വിപണിയിലേക്ക് ചുവടുവച്ചിരുന്നു. 2014ൽ 1,​201 കോടി രൂപ സമാഹരിച്ചതിന് ശേഷം കുറിക്കുന്ന ഏറ്റവും കുറഞ്ഞ തുകയാണ് ഈ വർഷത്തേത്.

ഐ.പി.ഒയ്‌ക്കായി 47ഓളം കമ്പനികൾ ഈ വർഷം സെബിയുടെ അനുമതി തേടിയിരുന്നു. ഇതുവഴി 51,​000 കോടി രൂപ സമാഹരിക്കപ്പെടും എന്നായിരുന്നു പ്രതീക്ഷ. എന്നാൽ,​ സമ്പദ്‌ഞെരുക്കവും ജി.ഡി.പി ആറരവർഷത്തെ താഴ്‌ചയായ 4.5 ശതമാനത്തിലേക്ക് വളർച്ചാ ഇടിവ് രേഖപ്പെടുത്തിയതും പല കമ്പനികളെയും ഐ.പി.ഒയിൽ നിന്ന് പിന്തിരിപ്പിച്ചു. 2017ൽ 36 കമ്പനികൾ ചേർന്ന് 67,​147 കോടി രൂപയും 2016ൽ 26 കമ്പനികൾ ചേർന്ന് 26,​494 കോടി രൂപയും സമാഹരിച്ചിരുന്നു. 13,​614 കോടി രൂപയാണ് 2015ൽ ലഭിച്ചത്. ഐ.പി.ഒ നടത്തിയത് 15 കമ്പനികൾ.

വെറും അഞ്ച് കമ്പനികളായിരുന്നു 2014ൽ ഐ.പി.ഒയ്ക്ക് മുതിർന്നത്. കിട്ടിയത് 1,​201 കോടി രൂപ. ഈ വർഷം ഓഫർ ഫോർ സെയിൽ (ഒ.എഫ്.എസ്)​,​ യോഗ്യരായ നിക്ഷേപകർക്ക് (ഐ.ഐ.പി)​ ഓഹരി വില്പന എന്നിവയ്ക്ക് മികച്ച പ്രതികരണം ലഭിച്ചിട്ടുണ്ട്. 81,​174 കോടി രൂപ ഈയിനത്തിൽ ലഭിച്ചു. 2018നേക്കാൾ 28 ശതമാനം കൂടുതൽ. ഏഴ് ഐ.പി.ഒകൾക്ക് ഈ വർഷം പത്തിരട്ടിയിലേറെ വാങ്ങൽ താത്പര്യവും ലഭിച്ചു. തൃശൂർ ആസ്ഥാനമായുള്ള സി.എസ്.ബി ബാങ്കിന്റെ ഐ.പി.ഒയ്ക്ക് 48 മടങ്ങ് സബ്സ്‌ക്രിപ്‌ഷനാണ് ലഭിച്ചത്.