ഇന്ത്യയുടെ വാണിജ്യാധിഷ്‌ഠിത കയറ്റുമതി ഒക്‌ടോബറിലും കാഴ്‌ചവച്ചത് നിർജീവപ്രകടനം. കയറ്റുമതി വരുമാനം 1.11 ശതമാനം കുറഞ്ഞ് ഒക്‌ടോബറിൽ 2,​638 കോടി ഡോളറിൽ ഒതുങ്ങി. പെട്രോളിയം,​ ലെതർ ഉത്‌പന്നങ്ങളുടെ ഡിമാൻഡ് കുറഞ്ഞതാണ് പ്രധാന തിരിച്ചടി. സാമ്പത്തിക ഞെരുക്കം ശക്തമെന്ന് വ്യക്തമാക്കി,​ ഇറക്കുമതിയിലും കുറവുണ്ടായി. 16.31 ശതമാനം കുറവോടെ 3,​739 കോടി ഡോളറിന്റെ ഉത്‌പന്നങ്ങളാണ് കഴിഞ്ഞമാസം ഇന്ത്യ വാങ്ങിയത്.

അതേസമയം,​ ഇറക്കുമതിച്ചെലവിലുണ്ടായ ഈ ഇടിവ് വ്യാപാരക്കമ്മി കുറയാൻ സഹായകമായത് ഇന്ത്യയ്ക്ക് നേട്ടമായി. 2018 ഒക്‌ടോബറിൽ 1,​800 കോടി ഡോളറായിരുന്ന വ്യാപാരക്കമ്മി കഴിഞ്ഞമാസം 1,​101 കോടി ഡോളറായി കുറഞ്ഞു. കഴിഞ്ഞമാസം ഇലക്‌ട്രിക് ഉത്‌പന്നങ്ങൾ,​ ജെം ആൻഡ് ജുവലറി,​ ഔഷധം,​ എൻജിനിയറിംഗ് ഉത്‌പന്നങ്ങൾ എന്നിവ നേരിയ കയറ്റുമതി നേട്ടം കുറിച്ചു. ക്രൂഡോയിൽ ഇറക്കുമതി 31.74 ശതമാനം കുറഞ്ഞ് 963 കോടി ഡോളറായി ചുരുങ്ങിയത് വ്യാപാരക്കമ്മി കുറയാൻ സഹായിച്ചു. അതേസമയം,​ സ്വർണം ഇറക്കുമതി 4.74 ശതമാനം ഉയർന്ന് 183 കോടി ഡോളറിലെത്തി.
നടപ്പുവർഷം ഏപ്രിൽ-ഒക്‌ടോബറിൽ കയറ്റുമതി 2.21 ശതമാനം കുറഞ്ഞ് 18,​595 കോടി ഡോളറായി. ഇറക്കുമതിച്ചെലവ് 8.37 ശതമാനം കുറഞ്ഞ് 28,​067 കോടി ഡോളറിലെത്തി. 9,​472 കോടി ഡോളറാണ് വ്യാപാരക്കമ്മി.​