സംസ്ഥാനത്ത് സൂക്ഷ്മ ചെറുകിട ഇടത്തര വ്യവസായങ്ങൾ തുടങ്ങാൻ ഇനി മുൻകൂർ അനുമതി ആവശ്യമില്ല.അനുമതി പത്രങ്ങൾ ഒഴിവാക്കിക്കൊണ്ട് വ്യവസായം തുടങ്ങാൻ വഴിയൊരുക്കുന്നതിനായി സംസ്ഥാനസർക്കാർ തയ്യാറാക്കിയ ബില്ല് ഈയാഴ്ച സഭയിൽ‌ അവതരിപ്പിക്കും. കേരളസൂക്ഷ്മചെറുകിട ഇടത്തരം വ്യവസായ സ്ഥാപനങ്ങൾ സു​ഗമമാക്കൽ ആക്ട് 2019 എന്നാണ് പുതിയ നിയമത്തിന്റെ പേര്. നടപ്പ് നിയമസഭാ സമ്മേളനത്തിൽ വ്യവസായവകുപ്പ് മന്ത്രി ഇ.പി.ജയരാജൻ ബില്ല് അവതരിപ്പിക്കും. ഈ സമ്മേളന കാലയളവിൽ തന്നെ പാസാക്കുകയും ചെയ്യും. ബില്ല് പാസാകുന്നതോടെ ഒരു സാക്ഷ്യപത്രം നൽകി 10 കോടി രൂപവരെ മുതൽമുടക്കുള്ള വ്യവസായം തുടങ്ങാൻ സാധിക്കും. വ്യവസായസംരംഭം സ്ഥാപിക്കാനും പ്രവർത്തിക്കാനും ആവശ്യമായ അം​ഗീകാരങ്ങളും പരിശോധനകളും മൂന്നുവർഷത്തിനുശേഷം പൂർത്തിയാക്കിയാൽ മതി. മന്ത്രിസഭ അം​ഗീകരിച്ച ഈ നിയമം നിർമ്മിക്കുന്നതിനുള്ള ബിൽ ​ഗസറ്റിൽ പ്രസിദ്ധീകരിച്ചു