രാജ്യത്ത് പ്രവർത്തിക്കുന്ന ഓൺലൈൻ വ്യാപാര ഭീമന്മാരായ ആമസോണിനും ഫ്ലിപ്കാർട്ടിനുമെതിരായ മത്സരവിരുദ്ധ ആരോപണങ്ങളിൽ അന്വേഷണം വേഗത്തിലാക്കുന്നു. കോംപിറ്റീഷൻ കമ്മീഷൻ ഓഫ് ഇന്ത്യ (സി സി ഐ)യാണ് അന്വേഷണം പുനരാരംഭിച്ചത്. കഴിഞ്ഞ വർഷം ജനുവരിയിലായിരുന്നു ഇക്കാര്യത്തിൽ സി സി ഐ ആദ്യം അന്വേഷണം ആരംഭിച്ചത്.

ചില വിൽപ്പനക്കാരെ മാത്രം പ്രോത്സാഹിപ്പിച്ച് അവർക്ക് വലിയ ഇളവുകൾ നൽകി വിപണിയിലെ മത്സരത്തെ തടഞ്ഞുവെന്നതാണ് ആമസോണിനും ഫ്ലിപ്കാർട്ടിനുമെതിരായ പരാതി. നിയമ നടപടികൾ കാരണം ഒരു വർഷമായി അന്വേഷണം നിലച്ചിരുന്നു. കഴിഞ്ഞയാഴ്ച കോടതി അന്വേഷണം തുടരാൻ അനുമതി നൽകി.സി സി ഐയുടെ കൈവശം തെളിവുകളില്ല എന്ന വാദം കോടതി തള്ളുകയായിരുന്നു. ഇത്തരം അന്വേഷണങ്ങൾ പൂർത്തിയാകാൻ ഏതാനും മാസങ്ങൾ മതി. അതേസമയം, ആരോപണങ്ങൾ ആമസോണും ഫ്ലിപ്കാർട്ടും തള്ളി.