ഇന്ത്യൻ സമ്പദ്‌വ്യവസ്ഥ 2021-22 സാമ്പത്തിക വർഷത്തിൽ 11 ശതമാനം വളരുമെന്ന് ഏഷ്യൻ ഡെവലപ്‌മെൻറ് ബാങ്ക് (എഡിബി). സാമ്പത്തിക പ്രതിസന്ധിയിൽ നിന്ന് കരകയറാൻ തയ്യാറെടുക്കുന്ന ഇന്ത്യൻ സമ്പദ് വ്യവസ്ഥയുടെ വളർച്ചയിൽ എന്നാൽ കൊവിഡ് പ്രതിസന്ധി ഭീഷണിയാകുമെന്ന ആശങ്കയുണ്ടെന്നും 'ഏഷ്യൻ ഡെവലപ്‌മെൻറ് ഔട്ട്‌ലുക്ക് (എഡിഒ) 2021'ൻറെ റിപ്പോർട്ടിൽ വ്യക്തമാക്കുന്നു.2022 മാർച്ച് 31വരെയുള്ള സാമ്പത്തിക വർഷത്തിൽ ഇന്ത്യയുടെ സമ്പദ്‌വ്യവസ്ഥ 11.0 ശതമാനം വളർച്ച കൈവരിക്കും. വാക്സിൻ വിതരണം ഇതിന് സഹായകമാകും. എന്നാൽ, കൊവിഡ് ബാധിതരുടെ എണ്ണം വർധിക്കുന്നത് ഈ വളർച്ചയെ അപകടത്തിലാക്കിയേക്കാം. അടുത്ത സാമ്പത്തിക വർഷത്തിൽ ഇന്ത്യയുടെ ജിഡിപി 7.0 ശതമാനം ഉയരുമെന്നാണ് പ്രതീക്ഷിക്കുന്നത്. 2020ൽ ഇത് ആറ് ശതമാനത്തിലേക്ക് ചുരുങ്ങിയിരുന്നു. അതിനാൽ ഈ വർഷം ദക്ഷിണേഷ്യയുടെ ജിഡിപി വളർച്ച 9.5 ശതമാനമായി വർധിക്കാൻ സാധ്യതയുണ്ടെന്നും റിപ്പോർട്ടിൽ പറയുന്നു.