ഇന്നലെ തളര്‍ച്ച പ്രകടമായിരുന്ന വിപണിയില്‍ ബുധനാഴ്ച്ച രാവിലെ വ്യാപാരം തുടങ്ങിയപ്പോഴും ഇടിവ് പ്രകടം. മുംബൈ സ്റ്റോക്ക് എക്സ്ചേഞ്ച് സൂചികയായ സെന്‍സെക്സ് 267.06 പോയിന്‍റുകള്‍ ഇടിഞ്ഞു. 
38,830.08 എന്ന നിലവാരത്തിലാണ് വ്യാപാരം നടക്കുന്നത്. 

നാഷണല്‍ സ്റ്റോക്ക് എക്സ്ചേഞ്ച് സൂചികയായ നിഫ്റ്റി 73.65 പോയിന്‍റ് ഇടിഞ്ഞ് 11,514.55 എന്ന നിലവാരത്തിലാണ് വ്യാപാരം പുരോഗമിക്കുന്നത്. അടിസ്ഥാന സൗകര്യ വികസനം, ഓയില്‍ ആന്‍ഡ് ഗ്യാസ്, റിയല്‍റ്റി, ടെലികോം തുടങ്ങിയ മേഖലകളിലെ ഓഹരികള്‍ നഷ്ടത്തിലാണ്. അതേസമയം തുടക്കത്തില്‍ ഊര്‍ജ്ജമേഖലയിലെ ഓഹരികളില്‍ ഇടിവ് പ്രകടമല്ല. 

ഏഷ്യന്‍ വിപണിയില്‍ ഉണ്ടായ തളര്‍ച്ചയും, ആഗോള രാഷ്ട്രീയ അതിശ്ചിതാവസ്ഥകളും വിപണിയില്‍ പ്രകടമായിട്ടുണ്ട്. ഏഷ്യന്‍ ഡെവലപ്മെന്‍റ് ബാങ്ക് ഇന്ത്യയുടെ വളര്‍ച്ചാ നിരക്ക് 7 ശതമാനം ആകുമെന്ന് പ്രവചിച്ചിരുന്നത് 6.5 ശതമാനമായി വെട്ടിക്കുറച്ചതും വിപണിയില്‍ പ്രതിഫലിച്ചിട്ടുണ്ട്.