അടുത്ത ഏപ്രിലില്‍ നിലവില്‍ വരുന്ന പുതിയ മലിനീകരണ നിയന്ത്രണ മാനദണ്ഡങ്ങളോടെ (ബിഎസ് 6) ഏഴു വാഹനങ്ങള്‍ പുറത്തിറക്കി മാരുതി സുസുക്കി മുന്‍നിരയില്‍. പുതിയ മോഡലായ എക്‌സ് എല്‍ 6 നു പുറമേ എര്‍ട്ടിഗ, ഡിസയര്‍, ബലേനോ, സ്വിഫ്ട്, വാഗണ്‍ ആര്‍, ആള്‍ട്ടോ 800 എന്നിവയുടെ പുതിയ പതിപ്പുകളാണ് ബിഎസ് 6 മുദ്രയോടെ മാര്‍ക്കറ്റിലെത്തിയത്. ഇതോടെ നിലവില്‍ ഇന്ത്യയി്ല്‍ മാരുതി വിറ്റഴിക്കുന്ന പെട്രോള്‍ കാറുകളില്‍ 70 ശതമാനവും ബിഎസ് 6- ല്‍ ഉള്‍പ്പെട്ടവയായെന്ന് കമ്പനി വ്യക്തമാക്കി.

ഹ്യുണ്ടായ് ഗ്രാന്‍ഡ് ഐ 10-ന്റെ പുതിയ പതിപ്പായ നിയോസ് ഉള്‍പ്പെടെ പല വാഹന നിര്‍മ്മാതാക്കളും ബിഎസ് 6 വാഹനങ്ങള്‍ വിപണിയിലെത്തിച്ചു തുടങ്ങിയെങ്കിലും ഏറ്റവും കൂടുതല്‍ മോഡലുകള്‍ ഒരുമിച്ച് പുതിയ സ്്‌റ്റേജിലേക്കു മാറ്റിയതിന്റെ ക്രെഡിറ്റ് മാരുതി സുസുക്കിക്കാണ്. അതേസമയം, ബിഎസ് 6 കാറുകള്‍ നിലവില്‍ പെട്രോള്‍ പമ്പുകളില്‍ ലഭിക്കുന്ന ബിഎസ് 4 മാനദണ്ഡമനുസരിച്ചുള്ള പെട്രോളില്‍ ഓടിക്കുന്നത് പ്രശ്‌നമുണ്ടാക്കില്ലെന്ന് കമ്പനി ഉറപ്പു നല്‍കുന്നു. ഇക്കാര്യം ഉറപ്പാക്കാന്‍ കമ്പനി നിരവധി പരിശോധനകള്‍ നടത്തിയതായും മാരുതി വ്യക്തമാക്കുന്നു.