രാജ്യത്തെ ഓഹരി വിപണിയിൽ വൻ തിരിച്ചടി. കനത്ത വില്പന സമ്മർദത്തെ തുടർന്ന് ഓഹരി സൂചികകൾ കൂപ്പുകുത്തി. വ്യാപാരം അവസാനിക്കാറായപ്പോൾ സൂചിക രണ്ട് ശതമാനം താഴ്ന്നു. സെൻസെക്‌സ് 1097.98 പോയിന്റ് ഇടിഞ്ഞ് (2.69%) 39,696.76ലെത്തി. നിഫ്റ്റി 304.75 പോയിന്റ് (2.55%) ഇടിഞ്ഞ് 11,666.30ലെത്തി.

നിഫ്റ്റിയിൽ പ്രമുഖ ഓഹരികളായ എച്ച്‌സിഎൽ ടെക്, ടെക് മഹീന്ദ്ര, ഭാരതി എയർടെൽ, ബജാജ് ഫൈനാൻസ്, ഇൻഫോസിസ് തുടങ്ങിയവ 2.60% മുതൽ 3.76% വരെ താഴ്ന്നു. അതേസമയം, ടാറ്റ സ്റ്റീൽ, ഹീറോ മോട്ടോകോർപ്, ഹിൻഡാൽകോ, ജെ.എസ്.ഡബ്ല്യൂ സ്റ്റീൽ എന്നിവ 1.15-2.52 ശതമാനത്തോളം ഉയർന്നു.

സെൻസെക്‌സിൽ റിലയൻസ് ഇൻഡസ്ട്രീസ്, എച്ച്‌ഡിഎഫസി ബാങ്ക്, ടിസിഎസ്, ഇൻഫോസിസ് എന്നിവ 400ൽ ഏറെ പോയിന്റ് താഴ്ന്നൂ.. 1,185 രൂപയുണ്ടായിരുന്ന ഇൻഫോസിസ് ഓഹരി 3.69% നഷ്ടത്തിൽ 1,094.20 രൂപയിലാണ് വ്യാപാരം നടന്നത്.

കൊവിഡ് വ്യാപനം രണ്ടാം ഘട്ടം രൂക്ഷമായതോടെ യൂറോപ്യൻ രാജ്യങ്ങൾ കൂടുതൽ നിയന്ത്രണങ്ങളിലേക്ക് കടക്കുകയാണ്. ഇതോടെ യൂറോപ്യൻ വിപണികൾ കനത്ത തിരിച്ചടി നേരിടുകയാണ്. യു.കെയുടെ എഫ്ടിഎസ്‌ഇ 100 ബെഞ്ച്മാർക്ക് (2.07%) നഷ്ടം നേരിട്ടു.