ലെനോവോയുടെ ഉടമസ്ഥതയിലുള്ള അമേരിക്കന്‍ സ്മാര്‍ട്ട്‌ഫോണ്‍ ബ്രാന്‍ഡായ മോട്ടോറോള ബജറ്റ് ഫോണ്‍ സെഗ്മെന്റിലേക്ക് മോട്ടോ ജി9 അവതരിപ്പിച്ചു. ബ്രസീലിയന്‍ വിപണിയില്‍ ഈ വര്‍ഷത്തിന്റെ തുടക്കത്തില്‍ അവതരിപ്പിച്ച മോട്ടോ ജി8 മോഡലിന്റെ പിന്‍ഗാമിയാണ് മോട്ടോ ജി9. 48 മെഗാപിക്‌സല്‍ പ്രൈമറി സെന്‍സറുള്ള ട്രിപ്പിള്‍ ക്യാമറ, 20W ഫാസ്റ്റ് ചാര്‍ജിംഗ്, 6.5 ഇഞ്ച് വലിപ്പമുള്ള ഡിസ്‌പ്ലേ എന്നിവയുമായെത്തുന്ന മോട്ടോ ജി9 വിപണിയില്‍ റെഡ്മി നോട്ട് 9, സാംസങ് ഗാലക്സി M21,റിയല്‍മി 6i എന്നീ ഫോണുകളോടാണ് മത്സരിക്കുന്നത്.

4 ജിബി റാമും 64 ജിബി ഓണ്‍ബോര്‍ഡ് സ്റ്റോറേജുമായി വില്പനക്കെത്തിയിരിക്കുന്ന മോട്ടോ G9-ന് 11,499 രൂപയാണ് വില. ഫോറസ്റ്റ് ഗ്രീന്‍, സഫയര്‍ ബ്ലൂ എന്നിങ്ങനെ രണ്ട് നിറങ്ങളില്‍ വില്പനക്കെത്തിയിരിക്കുന്ന മോട്ടോ G9-ന്റെ ആദ്യ ഓണ്‍ലൈന്‍ ഫ്ലാഷ് സെയ്ല്‍ ഈ മാസം 31 ന് ഉച്ചയ്ക്ക് 12 മണിക്ക് ഇകോമേഴ്സ് വെബ്സൈറ്റ് ആയ ഫ്ലിപ്പ്കാര്‍ട്ട് മുഖേന നടക്കും.