അന്തരീക്ഷ താപനില ഉയരുന്നത് കൊറോണ വൈറസിനെ ഇല്ലാതാക്കില്ലെങ്കിലും കൊറോണ വ്യാപനം താപനില വർദ്ധിക്കുന്നതനുസരിച്ച് കുറഞ്ഞേക്കുമെന്ന് പുതിയ പഠനം. മസാച്ചുസെറ്റ്സ് ഇൻസ്റ്റിറ്റ്യൂട് ഓഫ് ടെക്നോളജിയിലെ ശാസ്ത്രജ്ഞരുടെ പഠനപ്രകാരം ചൂട് കൂടുതലുള്ള ഇടങ്ങളിൽ കൊറോണ അതിവേഗം വ്യാപിക്കാനുള്ള സാധ്യത വളരെ കുറവായിരിക്കും. മൂന്ന് ഡിഗ്രി സെൽഷ്യസിനും 17 ഡിഗ്രി സെൽഷ്യസിനും ഇടയിൽ താപനിലയുള്ള പ്രദേശങ്ങളിലാണ് കൊറോണ വൈറസ് പകരുന്നതെന്നാണ് ഗവേഷകരുടെ കണ്ടെത്തൽ. 18 ഡിഗ്രിയിലധികം ചൂടുള്ള രാജ്യങ്ങളിൽ കൊറോണ വൈറസ് റിപ്പോർട്ട് ചെയ്തിട്ടുണ്ടെങ്കിലും ലോകത്താകെയുള്ള കൊറോണകേസുകളുടെ ആറ് ശതമാനം മാത്രമാണ് അത്തരം കേസുകളെന്നും പഠനം സമർത്ഥിക്കുന്നു. 2003 ലെ സാർസ് രോഗവ്യാപനവുമായി ഇപ്പോഴത്തെ കൊറോണ വ്യാപനം സമാനമാണെന്നും പഠനം കണ്ടെത്തി. അമേരിക്കൻ പ്രസിഡണ്ട് ഡൊണാൾഡ് ട്രംപിന്റെ നിർദ്ദേശ പ്രകാരണമാണ് സംഘം ഗവേഷണം നടത്തുന്നത്.